Shpetim Shala Biografia

I lindur në Pejë më 09.09.1985,

Shpëtimi rrjedh nga një familje sportistësh. Babai i tij ka qenë futbollist, ndërsa xhaxhai gjyqtar i futbollit. Familja e tij është me prejardhje nga fshati Baran i Pejës.Shpëtimi është më i vogli nga tre fëmijët e familjes.

Në moshën 15-vjeçare ashtu si edhe babai i tij fillon të stërvitet në sportin e futbollit ndërsa nga maji i vitit 2001 fillon sportin në të cilin tregon më së shumti shkathtësi, boksin.

Inspirim i tij si për shumë boksierë të tjerë ishte shqiptari i famshëm i ringut profesionist, Luan Krasniqi, të cilin akoma vazhdon ta ketë idhull.

Shpëtimi e filloi boksin në klubin e boksit "Peja" në qytetin e tij të lindjes me trajnerin Ahmet Shala, i cili vazhdon të mbetet trajneri më i mire me të cilin Shpëtimi ka stërvitur deri më tani. Duke garuar si amator si boksier i Pejës, Shpëtimi arrin që të fitojë titullin e kampionit të Kosovës për juniorë (të rinj) në vitin 2002 ndërsa në vitin 2003 bëhet edhe anëtar i reprezentacionit të Kosovës në boks.

Që nga viti 2005 jeton në Austri dhe prej atëherë stervitet në klubin e boksit "BC WIEN" me trajenrin legjendar austriak, 77-vjeçarin Josef Kovarik i cili në Austri njihet me emrin "krijuesi i kampioneve". Nën udhëheqjen e Kovarikut "Albanian Bomber" arrin që të shpallet kampion i Vjenës në vitin 2005 si dhe kampion internacional i Vjenës në vitin 2006. Në vitin 2007 merr titullin ASKÖ kampion i Austrise .

Shpëtimi gjithashtu ka qenë anëtar i përfaqësueses së Vjenës dhe ka zhvilluar disa ndeshje ndërkombëtare për përfaqëesuesen e kryeqytetit austriak ndër të cilat edhe përballja me ish-nënkampionin botëror për juniorë, hungarezin Andras Nagy i cili kishte 117 ndeshje në boksin amator.

Që nga fillimi kur në Vjenë fillon të boksoj në boksin amator nuk i mungojnë ofertat e shumta për të kaluar në profesionizëm, mirëpo Shpëtimi nuk ngutet pasi karriera e profesionistit për të është e shenjtë dhe nuk e ka lënë veten në duart e çdokujt.

Në janar të vitit 2008 fillon bashkëpunimin me shqiptarin Shpëtim Redo, një menaxher me prejardhje nga Dibra e Shqipërisë dhe që në Vjenë merret me gastronomi.

Ndeshjen e parë me 27 janar të vitit 2008, ditë kur kishte edhe ditëlindjen vëllau i tij Shkëlqimi, Shpëtim Shala shënon fitore ndaj ish-kampionit botëror në kikboks Giorgy Mihalik, duke u bërë një dhuratë të bukur vëllaut të tij. Ndeshjen e dytë ndaj sllovakut Michal Tomko gjithashtu e fiton me pikë, ndërsa në përballjen e tretë kundër hungarezit Janos Finfera vjen edhe fitorja e parë me "knock out" dhe e treta radhazi në profesionizëm.

Në bashkëpunim me menaxherin e tij Shpëtim Redo me të cilin ka një bashkëpunim të shkëlqyer dhe të cilit i është mirënjohës, "Albanian Bomber" planifikon që të radhisë suksese të reja në ringun profesionist austriak dhe atë evropian.