Shpëtim Shala rikthehet në vendlindje

Shpëtim Shala është rikthyer në Kosovë pas më shumë se tre vite e gjysmë qëndrimi në Vjenë të Austrisë. Përveç karrierës së boksit ishin edhe studimet ato që e kishin lënë larg vendlindjes 23-vjeçarin nga Peja. “Jam shumë i lumtur që më në fund do të jem në Kosovë, për të cilën kam shumë mall.

Çka është më e rëndësishme po kthehem me titullin e një sportisti profesionist, gjë të cilën e kam ëndërruar gjithmonë dhe falë zotit kjo u bë realitet”.

Mirëpo kthimi në Kosovë nuk do të jetë për pushime për “Albanian Bomber”, pasi menjëherë ai do t’i përkushtohet stërvitjeve dhe përgatitjeve për hapat e ardhshëm të karierës së tij.

“Në Kosovë do të kem një frymëzim dhe vullnet shtesë për stërvitje. Atje do të stërvitem nga trajneri im i parë, Ahmet Shala, i cili së fundmi është shpallur trajneri më i mirë i vitit 2008 në Kosovë”, ka thënë Shala.

Ai i ka vënë synim vetes që këtë vit të boksojë për titullin e kampionit të Austrisë në kategorinë gjysmë të rëndë (79.3 kg), dhe dëshira e tij është që këtë meç mundësisht ta zhvillojë në Kosovë.

“Për vitin 2009 i kam vënë vetes qëllim që të fitoj titullin e Austrisë në peshën time. Një luftë për këtë titull ma kanë premtuar menaxheri im dhe kryetari i federatës austriake të boksit profesionist. Mendoj se me 5 fitore radhazi kam dëshmuar se jam boksieri më i mirë në Austri në peshën time. Dëshira ime është që këtë duel ta zhvilloj në Kosovë.

Përgatitjet për këtë duel do t’i zhvilloj në Kosovë, ndërsa në plan kam edhe një fazë përgatitore 2-mujorëshe në Meksikë. Atje sporti i boksit është tejet i zhvilluar dhe i popullarizuar dhe do të jetë një gjë e mirë për karrierën time si boksier”, ka shtuar Shala.

Shpëtim Shala e ka zhvilluar duelin e fundit përballë kroatit Ivica Cukushiq më 22 nëntor të vitit të kaluar duke shënuar fitore me vendim unanim të gjyqtarëve.